මගෙ නම ලියැවුණු ඩෙස් එක අදටත් තියනව ඇති පන්තියෙ මුල්ලේ

දවසේ අවසන් කණිසම තෙක් අපි ඇගිලි ගැන්න
පන්තිය මුල්ලේ..
එක බත් පත කා හිනැහුන සැනසුන සරදම් කරගත්
ඩෙස් පල්ලේ..
පාට පාට හුණු කූරෙන් ලියැවුණු සෙනෙහස ඉතිරුණු
සිව් මුල්ලේ..
මගෙ නම ලියැවුණු ඩෙස් එක අදටත් තියනව ඇති
පන්තියෙ මුල්ලේ..

අවසන් සීනුව අවසන් වරටත් ඇසුනා
නොසිතූ මැසිවිල්ලේ..
අපට උරුම වූ මතකය සිර වූ සුසුම් දැරූ
බිත්තිය මුල්ලේ..
කිරි සුදුවන් කිරි පාටින් බැබලී පාසල් ගිය
ලස්සන කාලේ..
අකුරු කෙරූ හැටි තාම මැවෙනවා අපෙ හිත්
යා වූ පවනැල්ලේ..

- රුචිර වීරකෝන් -
24.10.2019

Hiking සෙත් කවි

ඇවිද්ද පය දහස් වටී පිං වේවා

කදු මුදුනෙදි ගිමන් වෙහෙස නැති වේවා

තියන කදු මුදුන් තව ලස්සන වේවා

මෙදා සැරෙත් ආසාවට අපි ආවා

දඹ වැහි නැතිව පොඩි පොද පමණක් වේවා

අව් රැස් නිවා මද නල තව පැතිරේවා

කදු මුදුනෙදි විඩාව අමතක වේවා

හයිකින් උණ ඇති උන් තව ඇති වේවා

මගෙ මව්බිමයි ගහ කොල වැලයි රැකදේවා

කදු නගින්න හිතේ හයිය වැඩි වේවා

කෙල්ලො කොල්ලො හැම දෙවියන් රැකදේවා

වැඩි වැඩියෙන් හයික් යන්න සෙට් වේවා

~සිව් අවුරුද්ද ~

වල ගැසුණු මිරිවැඩියෙ ඩයි දැමූ නිල් ඩෙනිමෙ
තැනින් තැන ඉරුණු තැන් තියෙනවා..
තිහට ගත් බත් තලිය තව පහක් වැඩි වුණිය
මාසෙ වැය පිරිමහන්න තියෙනවා..
මහපොළත් පරක්කුය දින දෙකක් එහෙමමය
Assignments අපි දිහා රවනවා..
අහර නිසි රස නැතිය වියදමක් කර බැරිය
දෙදාහක් අම්මටත් යවනවා..

මල් වැටුණු සරසවියෙ ඉරි ඇඳපු මහ පාරෙ
හෙමි හෙමින් අපේ අඩි තියනවා..
එකට පොත්පත් බලන එකම ඩිග්‍රිය කරන
අපෙ උන්ම කාරයෙන් දුවනවා..
දේශනය නිම වීලා Pizza Hut, Burger King
මචං උඹ එන්නැද්ද අහනවා..
තිබුණ නම් ඒ සල්ලි ඇද්දහැකි මාසයක්
හිත යටින් මටම මම කියනවා..